天王天后封咪防封殺
馮仁昭四圍超:阿扁就職禮盲星獻唱
張惠妹四年前喺台灣總統就職典禮上唱「國歌」,事後被內地封殺,阿妹嘅事業唔多唔少因而受到影響,近年佢喺樂壇嘅成績更加不停滑落。唔知係咪因為有人辦在前,所以喺下個禮拜四舉行嘅台灣總統陳水扁就職典禮上,當地嘅天王天后同當紅歌手全部唔見影,表演嘅竟然係當地一位失明男歌星蕭煌奇,同埋原住民歌手紀曉君。
消息外洩受壓力
失明歌手蕭煌奇喺上個禮拜收到自己會喺典禮上唱歌嘅消息後,開心到同台灣記者報料,之不過佢呢頭報完喜訊,隔咗兩個鐘頭後,蕭煌奇嘅助手就即刻同台灣傳媒講話消息外洩,令到主辦單位好唔高興,有可能因為咁而冇咗演出機會,希望記者唔好將呢件事報道出嚟,佢咁講就顯然係因為受到壓力啦。
台灣報道就話直到前日為止,蕭煌奇仍然係典禮嘅表演歌手,佢會喺三軍官校樂隊伴奏下唱「國歌」。蕭煌奇之前曾經話唔明點解啲人要對唱「國歌」咁敏感,馮仁昭睇怕佢經過呢次衰多口之後就明點解,不過佢都唔使驚人哋會封殺佢啦!
王菲無厘頭傳死訊
王菲𠵱家雖然喺泰國拍緊王家衞套《2046》嘅製作特輯,但噚日忽然之間有消息傳出話佢死咗,搞到中港台三地嘅記者都好緊張,即刻打電話畀阿菲經理人陳家瑛,佢話:「阿菲聽日就會去上海為演唱會出席記者會,佢根本乜事都冇,唔明點解會傳出呢啲嘢出嚟。」不過阿菲就重未決定會唔會跟王家衞大隊參加康城影展。
Rosemary魚翅送酒真識歎
混血名模Rosemary噚日喺尖沙嘴試食鮑魚魚翅午餐,Rosemary第一次食魚翅,佢重大讚好味,不過就話之後要游水做運動減肥。佢重即時試吓飲烈酒,不過就酒量麻麻,佢話:「我爸爸係法國人,每晚都飲一杯紅酒,亦有訓練我酒量,不過我都係一杯起、兩杯止,未試過飲醉酒。」
李克勤同左麟踢上銀幕
李克勤噚日到港台接受訪問,𠵱家佢除咗拍電影《六壯士》之外,遲吓重會同好拍檔譚詠麟一齊拍一套有關足球嘅電影,佢話由於「左麟右李」出碟同開演唱會都咁成功,令到佢哋都想試吓喺電影方面嘅反應,雖然𠵱家劇本重未定,但係克勤就好想同吳君如合作。
李逸朗護身符擋子彈
李逸朗將會有機會到埃及同約旦拍旅遊特輯,不過約旦附近地區不時會有戰亂,但李逸朗就唔係咁擔心,佢噚日喺港台接受訪問時話:「公司知安全先會安排去㗎,自己唔會有特別準備,唔通要帶件避彈衣咩,我只會拎個護身符同啲防曬用品就算。」後生仔真係乜都唔驚,不過就真係戥你屋企人擔心喇!
王蓉搭飛機寫歌解悶
樂壇新人王蓉噚日到商台接受訪問,佢近排有新碟推出,自然就要落力宣傳,佢話:「裏面有八隻歌係我創作,自己鍾意趁搭飛機嘅時間同埋喺屋企寫歌,因為隻碟都會喺內地同步推出,所以我遲啲會喺內地巡迴演唱,重會喺香港搞個小型音樂會㖭。」
張惠妹喺○一年為台灣總統就職禮獻唱,結果俾內地封殺。
資料圖片