韓國《MAMA音樂頒獎禮》今年喺香港亞洲博覽館隆重舉行，一眾韓星於傍晚時份均盛裝現身行紅地毯，當中包括權相佑、崔智友、宋承憲、尹恩惠、SISTAR、宋智孝等等。

女星無懼寒風露腿露胸大鬥性感，當中以穿上白色低胸晚裝現身嘅SISTAR成員孝琳，力谷其豐滿身材，成功搶鏡。

相反，出名身材出眾嘅Tiffany，就竟包到實，以高領嘅深色暗花連身短裙現身，只低調騷腿，被其他女星比下去。

韓國人氣綜藝節目《RunningMan》兩位主持宋智孝同李光洙亦齊齊現身紅地毯，今日智孝就著咗件低胸粉紅色連身長裙，雖然未算性感，不過親民搭夠，當台下有女粉絲大叫：「onni！（姐姐）」時，智孝立即向台下微笑作回應。而韓流始祖崔智友，雖然冇露肩露腿，著咗條銀色半透視嘅連身長裙壓軸登場，憑高貴氣質成功跑出，崔智友於訪問時表示最欣賞女歌手IU同男團EXO。