周三晚(6日)國際騎師錦標賽，戶崎圭太再次代表日本參戰，這位37歲好手陣上留放尺寸好，而且末段鬥後勁亦夠硬淨，難怪近兩屆騎師賽都有馬贏。今次戶崎的四匹座騎都有份量，其中第七場「神速寶」最有冠軍相。

第七場四班1650米：今場有幾匹前領馬，預期步速正常。「神速寶」近兩仗跑田草1400米都跑得接近，前仗遇上超慢步速不利形勢，末段造22秒54快時間，上仗卻遇上超快步速，頭一千米段速58秒52，牠沿途跟守五、六位，兼且走外疊望空跑，形勢極度欠佳，直路仍能夠加速上前，最終只輸半馬位跑第二，表現相當出色，反映呢匹四歲馬已經開竅，進度納入正軌。

目前「神速寶」只得43分著數到暈，季內至少有兩Win在手。今仗轉跑谷草兼且增程，「小法寶」子嗣普遍啱跑谷草中距離，部署絕對有根據，排二檔際遇應好，穩位望贏。

同場「紫電明珠」上季跑同程獲一冠四亞，目前評分比上季贏馬時低三分，與高班馬「幸運如意」拍跳全程走勢佔先，狀態回勇有得諗。「事必獲利」相隔上賽六星期，今仗體重增加11磅，馬身肌肉飽滿，狀態回復贏馬時水準。「天意」近仗表現不斷進步，需要跟進。