當年今日
關於我們

【玩物達人】女仔自拍要側面張臂提踭顯曲線

蘋果日報 2016/02/14 06:00

自拍Emma100毛吳檸儁庄靚龙

有冇試過喺instagram同facebook見到啲人嘅自拍相,P到連幅牆都歪埋?皮膚白滑到成個鼻都唔見咗?我見過,我真係見過。其實女仔自拍都要講究技巧,點止修圖咁簡單,快啲跟達人學嘢。
Emma是位全職模特兒,instagram的粉絲多達20k,如此多人追隨,除了因她喜歡自拍、經常更新相片,更重要的是身懷特別的自拍技巧。她的天字第一規條就是不加味精,「我唔會用太多手機app嚟修圖或者美白,一旦穿崩,啲相就留一世㗎啦。」然後配合自己最美的角度,就像拍攝當日Emma全程以左臉對着鏡頭接受訪問,即時靚上加靚。
此外,Emma還有三個小貼士,第一是挺直腰部,「只要將膊頭拉後,個人就會精神啲,如果着低領衫,鎖骨都會凸出啲,更加有骨感。」第二是手臂不要貼着身體,可以有效掩飾拜拜肉,看起來瘦一點;第三是站立時要交叉腳、提起前腳腳踭,營造出穿高踭鞋的效果,可以提升臀部線條,腿部肌肉也會更結實,「雖然提起腳踭會有啲攰,但自拍只係幾秒嘅事,唔會覺得好攰。」
自拍一定是大頭相?其實未必,Emma就建議選擇一些具反芒設計及計時功能的相機,藉此拍攝全身,「好多企喺度嘅姿勢更加能夠表現出女性美。」按下快門之前記得留意身後,「要留意有乜人行過,因為自拍都係想人睇到自己個樣,如果俾人photobomb、破壞咗個意境,張相就會變得好好笑。」

手手腳腳點樣擺?
臉 :要知道自己哪邊臉最美,然後朝向鏡頭。
手臂 :手臂不要緊貼身體,可以掩飾拜拜肉。
背 :不要駝背,挺直腰部感覺更加精神爽利。
身體 :不要正面對着鏡頭,否則影出來會很胖。
腳 :可以交叉腳、提起前腳腳踭,模仿穿高踭鞋的效果,讓腿部看起來更修長。

記者:馮永豪