今屆港區人大代表選舉有唔少新人參選，其中包括自由黨成員、律師會理事陳曉峰（Nick）。本身公務繁忙嘅阿Nick原來係屋企嘅「伙頭大將軍」，負責仔仔囡囡嘅餐單；更加係律師會美酒佳餚小組（Cookery, Food and Wine Interest Group）嘅主席，每年都會帶住一眾律師出國搵食兼學煮餸。

阿Nick今日帶同太太同傳媒茶聚，講到過去多年喺律師會嘅服務，太太就大爆阿Nick最重要嘅公職，係創立律師會美酒佳餚小組，每年帶住一班律師去法國、意大利、同四川等地，發掘美食；除咗識食，阿Nick仲因為早年喺澳洲讀書，而訓練到煮得一手好菜，仲話無咩拿手好菜，因為「只要講得出都煮到」喎。

講到人大選舉，阿Nick就透露自己近日馬不停蹄拜票，一晚至少出席4個活動爭取支持，佢又話人人都以為人大選舉係「欽點」，但做落先發現其實爭取支持唔係咁易，所以參選以嚟自己同太太都愈嚟愈瘦喎。