森美父母被隔離在鑽石公主號郵輪超過十日，森美昨早在商台節目《早霸王》開咪時坦言開始擔心：「初時指潛伏期有14日，但通常冠狀病毒就4日左右見到，當我見到父母5、6日都無徵狀所以安心啲。但噚日聽到武漢肺炎確診個案中有70個係冇病徵，分隔咗11、12日都仲有確診，即係有新感染，同埋可以潛伏咁耐。」

森美又指出船上零資訊，父母是靠他WhatsApp新聞。由於目前仍未知船上的傳染源頭，因此森美叮囑父母盡量小心：「叫媽咪沖涼時用濕毛巾封渠位，因為係中央冷氣，叫佢哋喺房都戴口罩。餐具就要用滾水洗，好似滾奶樽咁煲5分鐘。」森美透露父母測試報告未出，預計要兩日時間，他表示最想父母先離開郵輪，因船上確診個案每日增加，再不落船便有被傳染的機會。

政府可做得更好

有船上乘客稱回港後不想再被隔離14日，森美卻說：「作為仔，唔係我不孝，我情願佢哋返港後入隔離營，因為地球好危險，佢哋入住隔離營我會心安啲，因為嗰度安全，佢哋又測試咗冇事。我媽咪話都係，但暫時未知結果，再睇吓點再討論。」對於政府處理今次郵輪事件，森美覺得凡事永遠都可以做得更好。

另外，周志文、周志康及翟威廉昨日到《早霸王》做嘉賓宣傳新歌，三人表示自資近六位數出歌和拍攝MV，邀請了30多位藝人朋友客串，碌盡人情卡。
撰文：馬建華