復活節嘅焦點新股碧桂園，間公司成立咗10年，主席楊國強由泥水工人變成富豪地產商，但佢一向行事低調，上個禮拜嚟香港，出席機構投資者推介會，亦只係畀傳媒影相，冇講嘢。公司噚日搞招股記招，楊主席終於透過視像會議粉墨登場，親自現身省靚個招牌。
你咪睇楊主席個樣cool到爆，原來佢講嘢好盞鬼。由於楊主席將59.5%股份過晒畀25歲嘅二女楊惠妍，完全唔符合中國人處理家產嘅原則，令人覺得事有蹺蹊，仲俾人問，怕唔怕有接班人問題。
楊主席聽到呢個提問，好大反應咁話：「我只係53歲，你唔係想我聽日唔做嘛，我仲好後生，邊想退休啫，𠵱家講接班人，早咗啲。」楊主席仲好認真咁解釋，自己其實有3個女，二女係家族代表，負責揸住呢批股票，「即使到我100歲，都係畀佢，佢係自己人，信得過。」其實每人對錢嘅睇法都唔同，大家又何必傷腦筋，諗人哋點處理家產呢。

講番風趣嘅楊主席，當有記者問佢，碧桂園同雅居樂不相伯仲，投資者應該點揀，同埋公司未來幾年，打算賣幾多樓等等，佢都叫傳媒「自己去感受吓」。
佢似乎都好想講多啲公司發展前景，但由於「招股書以外，投資銀行叫我哋收口」，所以冇得講。講到興起，佢爆咗句「07年好多股息未派呀！」真係㩒都㩒唔住，嚇親身邊班公關同投資銀行家。
[email protected]