印象派大師莫奈17幅真迹嘅《他鄉情韻—克勞德‧莫奈作品展》正喺香港文化博物館舉行，展品包括3幅《睡蓮》。
八方提起呢位大師級人馬，係因為立法會強力抽濕機、自由黨榮譽主席田北俊又出動，佢喺fb上載咗同《睡蓮》合照，加上句咁嘅留言：「立法會會期將結束，如果可以將法國畫家莫奈嘅『睡蓮』贈與立法會的同事，唔知邊一位才實至名歸喱？」之後hashtag「唔講邊有得笑」、「開會最好瞓」等。
民建聯黃定光出名好瞓得，有次開會途中瞓到好冧，令社民連長毛擔心佢有生命危險！網民又點會估唔到田少抽象哥水！
除咗留言外，仲有網民改埋圖（圖），將田少旁嘅《睡蓮》改成象哥！
不過講番轉頭，象哥有幸化身睡蓮就講起都矜貴，皆因莫奈展覽嘅策展人Bruno Girveau早前接受訪問時，雖沒有點名講邊一幅，但稱展出作品單係其中一幅畫已值港幣1.3億喇。