之前缺席新城「勁爆樂壇頒獎禮」同港台「十大中文金曲頒獎禮」嘅容祖兒，今晚畀足面商台出席「叱咤樂壇頒獎禮」，祖兒唔怕得罪新城同港台，現身叱咤果然有回報，憑《心之科學》首奪「至尊歌曲大獎」，祖兒入行20年，分別攞過女歌手金銀銅、至尊唱片、我最喜愛的女歌手，但直至今晚，祖兒終於首奪至尊歌曲獎，成就大滿貫。

監製舒文上台話：「容祖兒恨呢個獎程度好高，等咗20年。」祖兒聽到都忍唔住喊，用手拭淚，之後佢冷靜落嚟話：「喺我宣傳呢首歌，我講過用堅持同決心去做，講完發覺唔對路，今晚坐喺度歌手，又有邊個唔係用決心、從來冇鬆懈、留手去做？所以我又有乜咁特別．我出道上一個世紀，99年新人，懷住堅持做每一首歌，終於去到今日得到至尊歌曲。」

跟住祖兒讀出《心之科學》嘅歌詞憑歌寄意：「月光 有人撈起 有人瞧不起」最後大大聲話：「永不洩氣就可以。」唱歌時仲邊唱邊扭腰，露出右肩，唱完更高舉獎座，興奮到爆。

精選娛聞，喺晒《娛果》
http://fb.com/appledailyent