要數噚日中環最熱話題，一定係有傳英國大行巴克萊銀行要合併渣打，雖然消息十劃都未有一撇，但渣打股價已經率先彈起，仲有熱心網民幫佢改定中英文名。
港人對巴克萊未必熟悉，但對渣打就一定有感情。話說渣打曾經有一段10年風光歲月，盈利年年創新高，可惜自從新興市場經濟轉差又屢被罰錢，搞到盤數見紅，都係上年先開始派返息，近年換來「渣兜」銀行之稱。
合併未知是好是壞，但「渣兜」就一定係改壞名，如果交易成真，未知渣打係咪可以改名轉運呢？
經過華華噚日一輪調查，發現有網民就建議改名做「巴渣」銀行，貪佢夠霸氣。不過，最多人建議都係「巴打」銀行，取其讀音有英文brother（兄弟）意思，嘩，真係一聽就知係好刁。

事實上，巴克萊CEO Jes Staley 同渣打行政總裁（CEO）溫拓思（Bill Winters）曾經就喺摩通「兄弟班」拍住上，溫拓思正正係Staley上司，而巴克萊總裁John McFarlane早年亦喺渣打做過，所以好有感情。
中文就有好名啦，但作為國際銀行，點都要改個英文名嘅。有人就建議Bar Chart Bank，唔知大家又點睇呢？

李華華
mailto:[email protected]