李連杰──武打明星；馬雲──中國電子商務之父、阿里巴巴（1688）創辦人兼主席，兩個風馬牛不相及嘅人，全靠「慈善」兩個字將佢哋拉埋一齊。皆因李連杰嘅慈善基金「壹基金」，家陣同馬雲嘅淘寶網合作推動慈善事業，李連杰仲叫馬雲做「馬師傅」，向佢請教「壹基金」嘅經營之道。
據《財富時報》報道，家吓李連杰全心全意搞「壹基金」，仲話「只談商業，不講電影」，直頭當「壹基金」係一盤生意。而今個月初，喺淘寶網5周年慶祝會，李連杰仲同馬雲簽咗長期合作協議。佢哋兩個人嘅合作關係有幾緊密？李連杰形容：「先同居，後結婚」喎，兩個男人肉麻當有趣。

關係如先同居後結婚

不過李連杰咁講都有佢嘅原因，話說10個月前，馬雲喺一個公開場合聽到李連杰對慈善嘅理想同態度，覺得同自己啱啱創辦阿里巴巴時一樣，「充滿理想和堅持」，而「壹基金和我對慈善的想法、理念相契合」，結果，馬雲同李連杰就經常一齊討論點樣做善事嘞。
後尾發生四川大地震，最早通知馬雲嘅就係李連杰，於是「壹基金」同淘寶網即刻合作，透過淘寶網進行網上募捐，短短10日就籌到2000萬人仔。就係經過呢10個月嘅「同居」，「壹基金」同淘寶網正式「結婚」。喺簽協議當日，李連杰仲叫馬雲做「馬師傅」，睇嚟李連杰唔係想向馬雲討教營商之道，只係想學點樣run「壹基金」。
華華諗，若然李連杰做馬雲徒弟，至少有樣嘢係青出於藍，乜嘢？馬師傅隻阿里巴巴，若然散戶由上市揸到𠵱家，股價唔見三分一。相反，「壹基金」擺明係做善事，投資者畀錢佢都只係想幫人，冇話望回報，李連杰肯定只有掌聲，唔怕有噓聲。

電郵：mailto:[email protected]