【港版國安法】將軍澳千萬盤準買家縮沙 市民：加快賣樓移民
蘋果日報 2020/05/24 16:49
買家縮沙港版國安法
讀者May（化名）做地產經紀的老友原本可以促成將軍澳三房千萬元交易，但兩組買家縮沙。
「諗住今晚（22日）簽約等收錢，估唔到買家立刻縮沙！」這是讀者May（化名）一名從事地產經紀的老友近日跟她訴的苦。May說，港版國安法推出後，上周五恒指大瀉逾1,300點，她這位經紀老友，原本可以促成將軍澳一個三房單位的千萬元交易，原定兩組客戶都出價1,000萬元，但兩組買家即晚縮沙，說是害怕港版國安法的推出會影響樓市。
居於沙田私樓、就快供滿會的May從事美容產品貿易，她向本報表示：「我呢個best friend做經紀，令到我都比較熟樓市，其實個市都旺緊起嚟，突然出國安法，買家咪卻步囉！呢位老友如果促成單刁，佣金都好和味。不過國安法推出，好多人唔知樓市會點走，唔少買家都突然hold一hold，聽講將軍澳好多交易都on hold。其實唔只將軍澳，其他地區好似粉嶺都有呢啲縮沙個案。」
她感到無奈稱：「大佬，股市一日跌1,300點喎，你估少㗎，跌返落22,000點水平喎，你睇誠哥個啲輸幾多身家？佢哋錢多就話啫，我哋啲小市民，嗰日都唔見十幾萬啦，我都驚㗎嘛，MPF都跌啦，人人都驚啦。而家係即刻繞過香港，即刻立法，對於香港民主自由前途，大家都好驚，今日啲人都出來遊行啦！」
問及會否因為港版國安法而賣樓移民？已婚未有子女的她回應：「梗係會啦！我不嬲都有了解投資移民，而家係加速呢件事囉！明年就會作出決定。可能台灣，方便、夠快，話投資移民要求160萬呀嘛。賣咗沙田層樓，都夠錢，但唔排除放租，要同屋企人商量，而我老公就支持投資移民。」她好無奈再說：「明明講好咗香港同中國有啲唔同㗎嘛，咁我哋而家其實同一個省份有咩分別呢？所以啲買家心態都係同我一樣，咁香港同大陸有咩分別？」