郭燕光(Yen)喺網上創立時裝寄賣網店GUILTLESS，生意發展順利，今晚喺中環開設期間限定店，郭燕光爸爸郭鶴年仲有李國寶、王大業都嚟支持。

郭燕光透過好友邀請城中名人捐輸，包括舒淇、李嘉欣、鍾楚紅、楊紫瓊等等捐出時裝、鞋履、手袋等寄賣，部份收益用作慈善，郭燕光多謝一眾名人踴躍幫忙，她指限定店會開一個月，主力都係經營網上生意，稍後會擴展到唔同地方開限定店 ，例如新加坡、紐約、巴黎等等 。郭燕光感謝父親郭鶴年專登過嚟撐場，收到父親親手寫嘅花籃覺得好sweet。

同場薛芷倫表示近日搬屋執了大量衣服打算捐出，家中有好多珍藏大師級衣物放喺貨倉，要開冷氣同抽濕機處理。

薛芷倫早前喺IG透露被外籍人士騷擾，佢今日親自解畫：「幾年前喺外國識咗一位自稱俄羅斯王子男士，成為社交圈朋友，最初對方成日聯絡我，我亦禮貌對話，早前對方話會嚟香港，要求我招呼佢，介紹名人佢認識做投資，我覺得有所企圖，於是決絕不回覆，但佢就繼續喺我朋友圈度搵我啲朋友話識我，騷擾我啲朋友，所以我自己出咗個post叫朋友小心呢個人，可能對方懷恨在心，之後喺IG留言人身攻擊我，我只係表明立場做好本份，呼籲身邊朋友唔好受佢騷擾。」