阿根廷國家隊為咗準備今個禮拜開波嘅美洲國家盃，周五就約戰尼加拉瓜拍跳，回歸國家隊嘅球王美斯就以隊長身份正選上陣。佢亦交足功課，喺105秒內梅開二度，帶領阿根廷以5:1大勝對手。

今仗阿根廷除咗有美斯擔正之外，亦有阿古路、盧施素，里安度柏利迪斯等出任正選。比賽阿根廷佔盡優勢，戰至37分鐘，美斯壓入禁區扭過三個後衛，再用左腳射入，一記非常美斯式嘅入球為球隊領先。一分鐘之後，佢又把握阿古路射門被對方門將拍出，門前執雞鏟入再建一功。兩個入球之間只係相隔105秒，係美斯喺國家隊需時最少嘅梅開二度。

其後國際米蘭的前鋒拿達路馬天尼斯、祖雲達斯的保羅戴巴拿亦等下半場都有後備上陣，其中拿達路馬天尼斯就成功梅開二度，加上效力屈福特的中場羅拔圖佩雷拉錦上添花，最終以5:1大勝對手，為美洲盃壯行色。下個禮拜日阿根廷將會踢第一場美洲盃分組賽，對手係哥倫比亞。

--------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
--------------------
《體蘋果》陪你睇波講波
https://www.fb.com/appledailysports