當年今日
關於我們

二手市場(消閒篇):
新幪面超人一出舊版映月升15倍

蘋果日報 2003/02/20 00:00


沉寂一時的幪面超人,在日本推出新一輯《龍騎》出乎意料受歡迎,依照傳統,《龍騎》又乘勢推出新公仔。推出近月,坊間看來公仔銷售情況一般,不知是Fans未熱身搶購,或是其吸引力已減退,與過去的難以相媲美。相反,二手幪面超人,如七十年代款、超合金甚至Q版限量版,近期卻多人搜尋,交投熱鬧。歸根究柢,全因《龍騎》出現掀起各人懷舊情緒。
記者:梁佩芬
攝影:陳盛臣
超合金最值錢
88年賣八十蚊的玩具,到今日可以升到千三蚊,一樣好賣所剩無幾,市場上膠玩具只有收藏意義,講到保值能力,超合金製成品才有此能耐,可惜成本高,日本已甚少推出超合金,就算有都係MadeinChina,要尋回這些珍品,荷包就大損;而且,回收價還可達四百,都無乜邊樣可媲美。好似這個「映月」,玩具新淨,手肘位的刺都未貼上去,完全未玩過,最緊要還是日本製造。
二手:$1,350(a)
原價:$80
回收:$400
ZO系列梁榮忠都搵緊
因為《龍騎》推出的熱潮,沉寂一輪無買的梁榮忠又再度出擊,他聲言是受卡通片影響,又再度瘋狂逛玩具舖。當然新貴《龍騎》古迦早已買到手,他卻要搵回93版的ZO電單車隊系列,全套五隻,當年一出就斷市,今年二手市場都所餘無幾。
二手:$550(a)
原價:$150 
回收:$200
石之森去世大膠炒起
原本大膠公仔不是太受歡迎,不知是阻碇定或造型太過笨拙,不少人都只收埋喺床下底。但數年前,作者石之森章太郎去世,幪面超人玩具忽然當炒,連帶這類50厘米高的、乏人問津的大膠系列都一併當旺。以二手市場來說,這個產量一般的大膠系列,算是超合金以外,最有價值的。
二手:$1,200(a)
原價:$200
回收:$400
02年《龍騎》太普通
真奇怪,日本方面《龍騎》咁受歡迎,但出公仔就好似唔多掂,唔知係年紀尚輕唔值炒,抑或貨量太多造成滯銷,定或香港尚未正式放映,個勢未去得太盡呢?
二手及原價:$65(a)
回收:$20
限量版可樂樽蓋
上年喺日本7-11的限量版樽蓋,要買可樂才可抽的扭蛋公仔,全套十五隻。這個寄賣貨,據悉是物主喺日本辛苦抽回來。
寄賣價:$550(b)
BlackRX首次BoxSet一盒10隻
89年推出的BlackRX,是Bandai第一套幪面超人BoxSet,全套十隻。
二手:$380(a)
原價:$150
回收:$100(散收$10/隻)
平價之選
復刻版炒唔起
日本經濟差,玩具生產商瘋狂推出復刻版,以求在Fans身上再撈一筆。這個背脊有拉鏈,一拉就會「咕嚕咕嚕」叫的超人,喺02年再度推出復刻版,曾引來一班二十來歲的後生仔入貨,可惜是,Fans對第二度複刻的玩具興趣日漸減退,未夠半年,已放回公仔舖。
二手:$580(a)
原價:$400
回收:$150
Q版超人二號
72?3年出電視版時,幪面超人的主角遇事要突然換角,二號演員演出一排後一號又突然復出,變成市面上出現兩個超人。而玩具製造商在製作制服上做了手腳,二號仔(即替身)衫膊頭位有一條間,以作區別。不過,替身二號仔都甚少出公仔,難得搵到Q版,二十蚊貨色,收藏計買得過。
二手:$20(c)
梁榮忠:搵舊玩具好慘
「有新貨就當然要買,最慘要搵舊版玩具,有時真係逐間玩具舖搵都未必有。我都試過放公仔,一來放個價唔高,二來我買得都係最鍾意,唔捨得放。」
Fans郭先生:超合金肉痛轉買Q版
「好似我咁年紀嘅人,都係睇幪面超人大,又係細個無錢買公仔,到十年前左右有經濟能力就買番嚟,試過用幾千蚊買番一套超合金,都好肉痛㗎,後來就專買Q版或者中型Size嘅,價錢平啲。最新一套《龍騎》,我都未儲齊。」
林先生:儲咗十幾年
「我鍾意電單車隊同扭蛋,大大話話都儲咗十多年,直到1999年,覺得真係有太多種類,屋企又放唔晒,重有啲重複咗,就開始放玩具。Set價前,先去其他舖頭格價,又或者趁有熱潮拎去放。不過,幪面超人都算有市場,全年價錢都差不多,無乜大上落,算係七十年代玩具中,還企得住的一種。」
Raymond:大膠價值不高
「最鍾意大膠公仔,不過近年都無乜新貨,可能市場價值不高,所以亦好難搵,但好在其賣價不高,只要搵到啱心水都會入貨。最唔鍾意近年推出古迦嗰期,日本嗰邊要搵錢,大量生產,搞到通街都係,有貨無價。」
a) 玩具跳蚤
電話:28826850
地址:銅鑼灣糖街3號銅鑼灣商業大廈1601室

b) 玩具一番
電話:25279807
地址:灣仔道188號東方188商場261號舖

c) Mr.Toy
電話:90484709
地址:灣仔大有商場222號舖