【體壇停擺】足智彩暫定受注球賽4月咁豐富? 德甲日職至少5月先重開
蘋果日報 2020/03/25 18:00
德甲日職足智彩武漢肺炎
日職暫定5月9日重開。
連馬會足智彩目前唯一受注嘅澳職聯，星期一踢完紐卡素噴射機主場對墨爾本城嘅比賽後，都宣佈延期，鍾意賭波嘅球迷，真係等了又等，唔知幾時先再有波賭。不過足智彩網頁又氹大家開心嘞，列出4月頭有過百場暫定受注球賽，包括德甲、日職、日乙、荷甲等，唔通真係咁快球賽就恢復正常？
大家唔好開心住，足智彩只係根據之前各賽會嘅停賽期，放住暫定受注球賽，而且疲情一路未有緩和跡象，德國方面，德足總建議德甲及德乙賽事繼續暫停到至少4月30日，相信賽會會跟隨；日職賽會亦都表示，5月2日先重開日乙，5月9日先重開日職，所以想睇日本波又好，賭日本波又好，都起碼要5月。足智彩之後更新網頁資料，暫定受注球賽終於冇放德甲、日職等比賽，不過仲保留荷甲、墨超等，但以目前情況，4月初呢啲聯賽重開機會都唔高，除非足智彩增加一啲非主流而且仲繼續進行嘅比賽，好似白俄羅斯、緬甸聯賽，否則短期內真係冇咩波賭。
足智彩暫定受注球賽，4月初竟有過百場比賽。
足智彩之後更新暫定受注球賽，仍保留荷甲、墨超等比賽。
日職今季只進行了第一周比賽，包括揭幕戰浦和紅鑽（右）勝湘南比馬3:2。