正當大家過完復活節假期，開始收拾心情上班，特首煲呔就避開旅遊旺季，下禮拜先開始放假。政府新聞處噚日公佈，煲呔下星期一開始放一個星期大假，直到星期六為止；佢休假期間，就由政務司司長唐英年署任特首。
八方聽聞今次煲呔放假，會同細佬妹外遊充電，地點係煲呔至愛嘅日本。聽聞今次仲係由細佬妹「發辦」安排行程，煲呔同佢夫人乖乖做團友，好似鴨仔團咁，唔使操心去邊度玩。𠵱家日本應該仲有櫻花睇，不過已經去到水尾，點解煲呔唔捨得畀多少少錢，早幾日出發呢？一家人去玩，唔志在啦。有政圈中人話，雖然日圓貴到飛起，但煲呔應該唔在乎，只係每逢長假，香港人雲集日本，隨時旺過旺角，煲呔避開人潮，玩都玩得輕鬆自在啲咁話。