本港前冠軍騎師潘頓剛周三（7日）晚於谷草騎大熱「文藝學家」不留而放，跑法同之前兩次後上贏馬完全唔同。結果該駒大熱倒灶，馬會照單全收，首席受薪董事祁禮謙仲三番四次強調滿意騎法。

事件發酵到今日（11日）仲未完全平息，頭場開賽前馬會CEO應家柏見記者，力撐競賽董事小組不罰潘頓是合理的，而作為事件主角的潘頓則如常出賽，並於第四場四班田草2200米，勝出蘇偉賢馬房大熱門「特獎」。

潘頓今場向此駒以過去從未試過的贏馬跑法，中段發力以前置方式勝出，從而替其完成四連捷，單Win及組合獨贏A1分別派39及24元。

「特獎」自3月初由潘頓重新策騎以來，對上三仗跑泥地1800米、田草2000或田草2200米，統統留到尾衝一段取勝而回。但今次一改過往早段留後、末段一衝過晒的跑法，中段開始潘頓催策將「特獎」加速上前，望空均速跑主動，咬到放頭馬「蒜頭爺爺」實一實。

直路上「特獎」進一步發力上前脫穎而出，潘頓唔使大力催策，此駒已拋離所有對手贏到離行離列，輕輕鬆鬆彈甩3.5馬位，完成四連勝，表現可謂大熟大勇。事後有網民話潘頓似乎想用行動說明，一匹馬更改跑法唔一定錯，只要夠實力一樣可以戰勝對手。

第四場又係熱頭冷腳，「特獎」3.9倍建功，半冷門「蒜頭爺爺」跑第二力保一席連贏配腳，三、四名分別為「實業風采」及「快樂神駒」，四重彩派二萬七千幾。