亞視今日喺會展參與「香港國際影視展2015」，執行董事葉家寶率領副總裁趙汝強、助理副總裁譚健深、冼偉智、周寶蓮、藝員朱慧珊、袁潔儀、蔡國威、林睿、亞姐冠軍張軼珺等進行展覽活動進行啟動儀式。

活動中，亞視公佈將推出多個節目，包括《ATV2015亞洲小姐競選》、《ATV2015亞洲先生競選》、《ATV2015感動香港年度人物評選》、《下一站諾富》、《開門見珊》、《尋找他鄉的故事》、《自遊自在食住行》等。問到今年係咪可以落實開新節目﹖葉家寶話：「原則上都係會開，無論牌照點樣，公佈之後都仲有一年，舊牌照先完，但我哋對續牌充滿信心，我哋股東同一啲新老闆傾緊，呢幾日會有新進展。」佢仲透露開拍新節目，大前題係低成本或零成本，就連今日亞視展台都係零成本。至於三月薪金，葉家寶指正在籌集中，希望四月二日前可以解決到發薪金嘅問題。

朱慧珊透露佢主持嘅新目《開門見珊》已經策劃咗一段時間，佢話：「我哋落區聽觀眾訊求、不滿，係一個為民請命嘅節目。」仍未知續牌成唔成功，會唔會有啲擔心﹖蔡國威話：「如果有新老闆，續牌機會都好高，所以我唔算太擔心。」朱慧珊：「雖然我唔知會係點，但我從來冇擔心，首先自己準備好，搞好啲節目，如果一有資金，有新投資者，我哋就可以即刻製作節目，咁樣先真正幫到亞視。」