由香港賽馬會保育活化嘅中區警署「大館」已經重開，唔少警界中人喺呢度都有唔少回憶，包括前警務處處長李明逵，因為佢喺1974至75年喺大館任職刑事偵緝部小隊主管，佢近日接受馬會《駿步人生》訪問憶述大館那些年時光，好記得返工首日要去拜會總指揮官，「最記得地板打了蠟，每行一步就跣一跣，要好小心，怕跌倒」，而佢個設於總部大樓二樓嘅辦公室呢，原來只係板間房，「到處漏水，落雨要邊擔遮邊打字」。由於刑偵小隊24小時運作，所以常備帆布床，夜間拉個被袋倒頭就瞓。

中區警署當年設有理髮室，作為軍裝小隊隊長，李Sir話每日好似班主任咁，要逐一檢查隊員頭髮，如果太長就要即刻去理髮室剪髮，所以有所謂「與『髮官』進行『飛髮活動』」嘅俏皮話（即係爛gag啦），後嚟就算調咗職，佢都成日去理髮。

訪問中佢都再被問到，主權移交當晚用貝多芬交響樂掩蓋示威者聲浪一事，其實李一哥以前都講過，因為當時辦公室只有兩隻碟，就係貝多芬同歌劇卡門；而喺音樂家同西班牙妓女之間，佢最終揀咗音樂家，佢笑稱：「警察執法可以是靈活、包容和幽默。」