黎燕珊、鄭文雅同鄧達智今日喺沙田出席攝影比賽頒獎禮，黎燕珊最近加盟大台，11月就會開劇，問佢怕唔怕辛苦？佢話：「我都好多年冇拍劇，預咗要早接夜，最緊要有得辛苦。早兩日返公司，覺得好新鮮，感覺好似幼稚園返學，新人重新學習。」

提到前夫劉永之前出嚟話自己能力有限，供養唔到一對小朋友，黎燕珊話：「我對佢講乜都冇乜感覺，咁多年嚟對佢已經冇感覺，佢責任上嘅態度好弱，惟有我教對仔女一定要有責任，身教好緊要。作為父母為咗仔女乜都會包容。」

問到係咪為咗供囝囝去英國留學用晒積蓄？生活係咪好辛苦？黎燕珊話：「咁多年都慣咗，我一向都冇積蓄，畀晒對仔女。」

而劉永講到有錢都想畀個仔坐專機去英國留學，黎燕珊就冷笑話：「佢應該做主持，鍾意講乜就講乜，可以做編劇。總之我為咗對仔女任何嘢都可以包容，赴湯蹈火，我唔諗佢點解咁講，唔好嘅態度、負能量嘅嘢唔去諗，自己努力。」

另外，身為評判嘅鄭文雅就攞咗4張攝影作品作展覽，主題都係圍繞香港文化嘅，其中一張更係佢喺元朗南影嘅，佢話：「元朗南將會有大發展，嗰度係我嘅祖居，亦都有祖屋喺嗰度，希望唔會變得太多。」

相關文章：
【爸爸冇用】黎燕珊按樓供仔出國讀書 前夫劉永：做綠葉能力有限
http://bit.ly/2hpFxDy