比利時周一喺聖彼得堡對芬蘭嘅歐國盃B組賽事，上半場補時有位衣着性感嘅索女闖入球場，佢身上T恤印有「WTF Coin」（圖），目的相信係為咗宣傳加密貨幣。場波因為索女嘅亂入一度中斷，但佢好快就俾球場保安帶走，不過保安人員押送佢走嘅時候就疑似施展「鹹豬手」，惹起關注。至於B組另一場丹麥4:1大勝俄羅斯嘅賽事，亦有不速之客入侵，有位身穿俄羅斯波衫嘅男士又係咁衝入場，但待遇就同比利時場波嗰位女士差天共地，俾保安人員成個㩒落地制服。