歐元跌破九，買嘢買到唔捨得走。（好爛，我知。）
歐元係咁跌，上周一度跌到11年新低，兌港元跌破九，之後升番少少，噚日一歐元兌8.9769港元，搞到費清心郁郁，好想去歐洲瘋狂shopping。被封為「世界級港女」嘅杜如風當然足迹遍佈全球啦，費清就請教吓佢。佢話：「如果呢排去歐洲，梗係快快手買瑞士名錶啦，尤其係買勞。」佢話瑞士係勞力士等名錶之都，瑞士法郎脫「歐」後急速狂升，名錶價格肯肯定好快大升，呢個時候唔趁低吸納，更待何時？

太子珠寶鐘錶執行董事朱繼陶都話，瑞士名錶廠呢排真係傾緊會唔會調整價格，「應該好快有公佈，睇怕唔加都唔得」。佢話，由於歐洲可退稅，加上歐元跌，喺當地買錶係平過喺香港買少少。不過，佢話一旦公佈加價，全球銷售名錶店舖都要一齊加，但香港嘅加幅可能冇咁高，因為本地名錶貴價市場已因為內地豪客減少而生意受影響，所以唔敢貿然加太多價，「到時拉上補下，可能同歐洲價格差距拉近」。
交通銀行香港分行首席經濟及策略師羅家聰話，歐元應該仲有排跌。「歐洲團真係超級旺，除咗瑞士」。旅遊業議會總幹事董耀中話，農曆年歐洲團費平咗一截，好多團友飛去法國巴黎老佛爺等百貨公司瘋狂血拼，但唔少團都skip咗瑞士呢程，因為使費貴吖嘛。

費清　 ＃要生計，也要生活 ＃毋忘初衷