由苗僑偉、林峯同佘詩曼主演嘅劇集《使徒行者》上年播出收視唔錯，內地嘅博納公司牽頭拍電影版，仲拉埋古天樂嘅天下一、寰亞合作，無綫都會投資番少少。

電影版導演用番《使》劇監製文偉鴻，去咗寰亞嘅梁家樹會做監製，顧問就係王晶，演員就繼續由阿佘演番「釘姐」，反而飾演爆Seed嘅林峯就冇份做，而古仔同張家輝嘅黑社會人物係全新創造出嚟，吳鎮宇會做一個精明警察。

故事方面，會延續劇集5個卧底之後，其實仲有第6個，所以電影版主要講述黑幫要追查混喺佢哋組織內嘅第6個卧底係邊個，咁到底係家輝定古仔呢？0依家就唔踢爆喇，留番觀眾入場睇啦！

《使》片製作費約8,500萬元，聽講會去巴西拍外景，預算下個月中開拍，其實唔好以為會有好多錢拍，因卡士面都幾乎去咗一半製作費，家輝收2,000萬元片酬、古仔1,500萬元、鎮宇1,000萬元，加埋監製、導演同其他演員嘅支出，製作費真係要慳住使，如果計唔掂數，聽講會放棄去巴西拍外景。

而《使》套劇本身就有「負皮王」梁烈唯都有份，唔知電影版有冇佢份呢？如果有，又唔會唔會出現上次嘅信用卡嘅效果呢？