當年今日
關於我們

【賭馬講呢啲】爆冷賽果難預測 評馬人非戰之罪(妙瞳)

蘋果日報 2018/12/21 23:00

妙瞳賭馬講呢啲爆冷

剛周三(19日)泥地夜馬,跑八場開了三條過千蚊Q,頭場「萬霸駒」搭「勁快步」派$186.5已是全晚最熱一條。賽後筆者聽到有馬迷揸住份馬經,不停鬧評馬人畀埋啲山埃貼士!
但跑到這些超冷賽果,就算你用到計得最精準的電腦程式甚至人工智能,都不太可能條條Q都貼到。
以統計學角度,整晚賽果大多是違反常態的變異數,單看八場馬共16隻頭二馬,只得「萬霸駒」、「激賞」以及「精算閃擊」三匹雷神頭馬上仗跑入三甲便知!
不是幫任何評馬人甚至大戶的電腦講說話,依照他們正常選馬章法,剛周三多食白果反而正常!調轉如有馬迷見某某貼士這次全泥宴掂的話,筆者反建議應該睇睇之前人哋貼咩馬,這才能避免以偏概全。
十二月的三次日馬,賽果就正路得多,皆因騎師三強潘頓、莫雷拉以及蘇兆輝均交到功課。周日(23日)潘頓繼續停賽,剩下雷、輝二人擔大旗。
當中前者始終是蔡廐主帥,騎外線馬受局限,同時間益了蘇兆輝做正潘頓替工,分別取得後者的「數糊勇士」、「繽紛遊戲」以及「達龍駒」三匹私家馬帥印,其中「繽紛遊戲」剛戰初出於泥地1200米彈離贏馬,賽後羅富全還說覺得此駒不太鍾意玩泥沙,間接告訴大家這是大超班馬,轉戰草地可期連捷。
至於「達龍駒」貴為昆士蘭打吡冠軍,上仗國際賽日(9日)初出1600米跑第三,今次跑2000米更合腳法,可讓蘇兆輝做過快樂替工。