自稱人渣嘅周永恒（Roy）同趙頌茹（Yu）本來分居兩年期滿，本來喺大前日宣判離婚，點知阿Roy最後冇上庭，事後阿Yu話已經通知咗佢，但係唔知點解冇上庭。(新聞連結： http://bit.ly/2mWzyHH )

今日阿Roy嘅強國女友Britni喺fb為仔出頭，聲稱已經忍咗好耐，仲話手頭上有一個證據，只不過阿Roy為咗保護阿Yu同一對小朋友先唔公開，又叫佢唔好逼佢向媒體公開一個未公開嘅秘密！Britni仲留言叫阿Yu唔好消費前夫！

唔知係咪有唔少人叫Britni唔好理人哋啲家事，隔咗一個鐘，Britni又發功護男友，佢再留言話：「呢2年佢有冇收過贍養費，佢自己最清楚，金額接近1球(100萬)！周生通過乜嘢人俾佢都查得到。」之後有人叫佢有證據就拎出嚟，佢又話：「0依家未適合公開，遲啲一定會交代清楚，咁對佢都公平。」

點知轉個頭都未見到有證據拎出嚟，個PO已經唔見咗，男嘅繼續冇影，真正原因為乜嘢，只有佢哋最清楚！

只求盡快辦妥離婚手續嘅阿Yu今日接受《蘋果》電話訪問，講到俾前夫嘅新歡Britni喺網上留言攻擊，阿Yu暗寸：「我都唔係好想畀人消費囉，第三者嘅事，我就唔會多作回應，我要處理嘅都係目前為單案要處理嘅嘢就夠嘞。」對於對方聲稱「唔好逼我公開秘密」威脅，問到係咪有秘密喺Roy手上，驚唔驚呢？阿Yu語氣嚴肅強調：「第一，我都好想知，我行得正企得正，唔會驚呢啲嘢，我都好希望對方最緊要處理當前問題，例如嚟緊嘅案，希望盡快完結呢件事。」

至於Britni再稱男友俾咗近1球俾阿Yu，阿Yu否認兼諷刺話：「嘩！乜咁得意呀，咁好笑呀，如果我真係收到呢1球，咁就真係好囉，應該可以風流快活囉，咁當然係冇啦，講真做人最緊要行得正企得正，冇就係冇，希望件事快啲完結囉。」

《蘋果》第十二屆金話梅電影選舉（Golden Plum）又嚟喇!由今日起，請在以下網址（ http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。