衛蘭（Janice）一連三場的「Oh My Janice演唱會」前晚在紅館舉行尾場，Janice的圈中朋友包括張栢芝、張文慈、黎瑞恩、黃婉君等前來欣賞演出，Janice的爸爸亦有來捧場，身旁還有一個女伴。
Janice因為感冒來襲，影響連日來的演出，Janice坦言對自己表現失準，感到不開心。她完騷後在後台受訪時說：「2月中先可以休息，有內地演出要做，我都好唔開心，一開騷就病，好想以最好狀態唱畀大家聽。」

克服舊患

陳柏宇為Janice尾場演唱會擔任嘉賓，Janice在台上大讚對方：「佢喺呢一行有好特別聲線。」陳柏宇則回應：「佢讚我好，但係唔係話我唱得好好。」陳柏宇則自爆發生不快事：「第一次嚟紅館做人哋演唱會嘉賓，公司叫我千祈唔好出走，唔係，係出醜。今日遇到唔開心嘅事，就係嚟綵排嗰時，撞花咗自己架新車，係聖誕節送畀自己嘅禮物。」
演唱會上，Janice提到兩年前脊柱痛症：「大家唔好睇我咁，以為我下巴肥，我真係有做運動㗎，身邊朋友講，可以做運動，唔會整傷舊患，我克服到，係靠信念，我唔識中文都唱咗十幾年中文歌喇！」之後記者問Janice是不是增肥，她說：「冇特登去增肥，亦都冇刻意去減肥，我都有做gym同跑步，都驚會傷到脊柱，之前試過做運動郁到傷到條腰，唔可以企直，所以我再做番運動都要少少勇氣。」
採訪：馬建華
攝影：仇志德