【草蜢尖子單飛】蔡一傑自學泰文騷Quali 五國語言歌輪流唱
蘋果日報 2019/09/15 00:30
草蜢蔡一傑
蔡一傑、蔡一智和蘇志威成軍草蜢34年，今年來個新搞作，蔡一傑除推出個人專輯外，將會在下月26至28日在伊館舉行首個個人音樂會。有別於平時在紅館講求歌精舞勁，今次獨立演出卻主力展露才華，之前曾笑言讓樂迷看自己溫文爾雅一面的他，日前接受訪問，自言一個人站在台上會更專心於唱歌，因為耳機只會聽到自己的聲線：「做草蜢時可能喺表現上歌精舞勁，顧住騷啲衫同騷舞台，今次反而係實而不華，踏實啲，希望做多面體的蔡一傑畀大家睇，原來蔡一傑係可以唱唔同類型嘅歌。」
音樂會上除了唱出多年來獨唱歌外，蔡一傑會選唱很多高難度「別人的歌」，更會唱5國語言：廣東話、國語、英文、日語和泰語歌曲：「早前我就有一首日文歌，到時都會唱一啲兒時我喜歡嘅。以前草蜢都有翻唱一啲泰文歌，但今次真係唱泰文，唔可以丟架，之前唱日文都有人讚我唱得標準，所以我會用心唱。」其實兩種語言都是他購買語言書自學，問他是否特別有語言天份？他笑說：「少少啦！讚自己又無謂，尷尬嘛，因為我鍾意泰國同埋泰文，但我講可能你哋有啲會笑，首先學簡單的泰文同大家溝通。」兩種語言間他覺得泰文發音較難，幸好自己家中有泰籍傭人，間中他會跟傭人學習：「有啲字問清楚佢發音，平時我同佢會用泰文溝通，以往我得閒有興趣學，當歌仔咁聽慢慢學。不過有時會同佢拗字點發音，因為泰國各個地方口音有啲唔同，有啲唔一樣發音。」
訪問當日蔡一傑於健身室做運動，他穿上背心露出麒麟臂操練，而他一直持之以恆做運動，每天3個多小時在健身室，又會游水兼跑步，稍後打算跟教練學打拳練氣兼令線條更突出，訪問其間突然拉起衫露出8嚿腹肌：「仲未係最滿意，未到我顛峰時候。我從來冇度自己胸肌幾多，腰就保持30吋腰已經有廿幾三十年，做運動唔係鬥大鬥闊，係想要個線條，啱自己比例，我鍾意膊橫橫、扁身啲，我鍾意咁樣着西裝會好睇啲，個胸唔好太大，太大凸咗出嚟唔好睇。」
另外，他為音樂會設計了兩款衫，其中一件日文字是他英文名（Remus）的日文寫法，第二款他手繪，個「O」字有笑哈哈公仔：「希望而家香港人個個都開心啲，入嚟睇我嘅騷開心，帶畀快樂的音樂會，帶正能量。到時會賣，未知會唔會現場賣，可能網上賣，售完即止，我唔係整太多，唔想存咁多貨，又唔係要賺錢，亦有夾埋一套，優惠價益街坊酬賓周，周末個周。」
採訪：王連連
髮型：Michael @Headquarters
化妝：Will Wong
場地：海洋公園萬豪酒店
髮型：Michael @Headquarters
化妝：Will Wong
場地：海洋公園萬豪酒店
攝影：林賓尼
蔡一傑下月迎來首個個人音樂會。
由組合變單飛，蔡一傑說會更專心唱，亦要練好線條。
最近每日都要留在健身室3小時。
今次個唱會唱5國語言，包括自學的日文及泰文歌。
蔡一傑亦有設計戰衣，包括手上這件「O」字有笑哈哈公仔，他希望帶給歌迷快樂。