有「日本奧斯卡」之稱嘅第41屆日本電影學院大獎已喺東京舉行，去年憑《幸福澡堂》封影后嘅宮澤理惠偕同年屆70歲嘅頒獎禮委員會副會長西田敏行擔任大會司儀。

由是枝裕和執導、福山雅治主演電影《第三度殺人》奪6獎成為今屆贏家，共奪最佳電影、最佳導演、最佳劇本、最佳剪接，役所廣司及廣瀨鈴分別憑呢套戲擸埋最佳男配角同埋最佳女配角。

現年25歲嘅菅田將暉憑電影《啊，荒野》大熱封最佳男主角，其另一主演電影《帝一之國》亦為菅田獲頒話題演員獎。最佳女主角方面，《鳥獸行》嘅蒼井優成功擊敗新垣結衣、土屋太鳳、長澤正美、吉高由里子榮封影后，蒼井優上台領獎時感動落淚。

今年頒獎禮有不少圈中女神出席，除咗幾位候選影后之外，北川景子都晒腿到場爭最佳女配角，但最後都係不敵廣瀨鈴。至於賣座愛情片《我想吃掉你的胰臟》奪話題電影獎，而兩位主角濱邊美波、北村匠海則與竹內涼真、中條彩未齊贏得最佳新人殊榮。

精選娛聞，喺晒《娛果》
http://fb.com/appledailyent