【新增動新聞】

利物浦中場占士米拿喺球隊3:3逼和阿仙奴場波後表示，紅軍日後喺領先嘅時候，應該要「踢得悶啲」，唔好一味掛住攻。利記領隊高路普賽後被問到對占士米拿嘅評論有咩睇法嘅時候話，佢都同意呢個講法。

呢位德國籍主帥話：「佢啱㗎，100%正確，占士米拿嘅意思係要控制場波喇，但今場波其實唔關事。第一個失波幾乎全部人都喺禁區，大家都睇到，如果祖高美斯向住個波行一步再大腳清走佢，根本無事會發生。我哋無做好反應，所以阿仙奴入到波，呢個唔關控制場波事，你唔可能全場波95、96分鐘每次出波都截住。」

高路普繼續講：「第二球波，格列沙加射多幾次呢腳波嘅話，米諾列特99.9%都會救到，不過係今晚唔得。我哋只能夠接受現實，但呢個都唔關有無控制場波嘅事。我哋畀晒機會之後阿仙奴係變得好有威脅，佢哋係有咁嘅質素，奧斯爾果幾分鐘真係好享受呢場比賽。」

--------------------
狂賀！BFB系列推出5周年，精彩活動為您安排，立即登入速享專屬優惠！ http://bit.ly/2xrTKGM