當年今日
關於我們

【帶女化妝師回家?】阿田笑朋友耷低頭太驚青 杜汶澤:佢冇見過呢啲場面

蘋果日報 2019/03/19 16:45

走佬去馬拉田蕊妮杜汶澤ViuTV

【新增內容】
杜汶澤早前為ViuTV拍攝節目《走佬去台灣》,收視不錯,今次ViuTV再邀請阿澤拍續集《走佬去馬拉》,在影視展公佈4月29日逢星期一至五夜晚10時30分播出。
阿澤解釋早幾年被大陸封殺,他到馬來西亞開公司及開戲,所以對當地比較熟悉,他大讚:「馬拉係移民好地方,幾廿萬就可以去,我喺怡保睇過一塊地,呢塊地望住golf場,可以建一間8千呎嘅屋,只係百幾萬港紙,加埋建築費,約4百萬左右,以我能力,喺香港一世都買唔到8千呎嘅屋,當然真係要買,要等我退休嗰陣。」
他指曾跟老婆田蕊妮提議,他說:「佢唔捨得隻貓,如果真係要移民去馬拉,隻貓係唔使坐移民監,所以消除咗佢個問題。」這次拍續集有沒有加價?他笑笑口說:「冇加價,喺節目照爆粗,天生爛口,粗口只係助語詞。」
早前有傳他趁老婆田蕊妮離港帶女化妝師回家,女方見記者突然拍照,即嚇到低頭避鏡頭,最終阿田代阿澤澄清大家各自有朋友,約人吃飯很正常,阿田當時笑言下次要帶靚仔回家,阿澤笑言要介紹馬拉仔給老婆,他說:「打個平手,其實同朋友聚會,之前有同阿田講過,佢(阿田)喺度笑我個friend,耷低個頭咁驚青,突然之間衝出嚟,我都驚啦!我得罪咁多人,或者共產黨派人嚟殺我呢?加上佢(女化妝師)唔係呢一行,馬來西亞人好純樸,冇見過呢啲場面。」問到之後會否修心養性,阿澤:「以我呢個年紀,想起都唔係咁容易,總之有苦自己知喇!」
另外,ViuTV與優酷首度合作的愛情懸疑劇《歎息橋》今日亦舉行記者會,首次擔任監製的林保怡與周家怡、衛詩雅、伍詠薇和陸駿光等一起出席,劇集分別於香港和歐洲兩地取景。
伍姑娘在活動上大讚林保怡做監製並表示:「我畀佢100分」,但她又立刻投訴指保怡沒有帶她與周家怡同行,保怡解釋:「帶埋你哋去就拍唔到㗎喇,你哋實掛住玩。」而保怡指其實兩年前已經開始構思這個劇本,因為見到當地景色美麗,所以就與導演去商量,到比利時拍攝。
講到保怡同周家怡自《瑪嘉烈與大衛系列-綠豆》之後再合作,問保怡是否因為合演過所以再找周家怡?林保怡笑言:「梗係啦!佢係提名金像獎最佳女配角。」被擺上枱的周家怡識做賣口乖說:「同保怡合作,演技先有所提升,所以先有提名。」保怡聞言立即望着自己對鞋:「喂,我今日着布鞋喎!」暗示叫周家怡不用擦鞋。
問到保怡第一次做監製的滋味,他說:「每日我都第一個到場,喺香港拍咗50日,先去比利時拍6組戲,每一日都好早起身,當地又凍又大風。」他更對周家怡說:「好彩你冇去咋。」周家怡即笑言:「保怡下次應承帶我去旅行補數。」而保怡又坦言今次做監製,對收視都有壓力,他說:「因為呢個故事好人性,觀眾要思考先會睇得明,亦都可能要睇兩次,睇完就會覺得好心痛好肉緊,不過我都儲咗一班會思考嘅觀眾。」
-------------------------
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
-------------------------
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef
empty
阿澤宣傳新節目《走佬去馬拉》。(右圖攝影:陳俊強)
empty
阿澤解釋早幾年被大陸封殺,他到馬來西亞開公司及開戲。
empty
早前有傳他趁老婆田蕊妮離港帶女化妝師回家,最終阿田代阿澤澄清約人吃飯很正常。
empty
阿澤笑言要介紹馬拉仔給老婆。
empty
周家怡與林保怡繼《綠豆》後再合作。
empty
伍姑娘投訴保怡沒有帶她和周家怡到比利時拍外景。