黎明(Leon)噚晚喺澳門舉行「黎明LEON RANDOM RUN 2017」演唱會，出名係金句王嘅Leon，因為不停爆金句，搞到演唱會都變成棟篤笑，觀眾聽到開懷大笑。Leon同台下觀眾傾咗好多偈，其中有個問答環節，spotlight 照到嗰位就可以發問問題，有個女觀眾同Leon講：「祝你生日快樂，我都就快生日，唔可以祝我生日快樂?」Leon答：「邊個生日都好，前幾日生又好，過幾日生日都好，總之我喺度祝大家生日快樂！」跟住有個男觀眾問：「我永遠支持你，你認唔認得我?希望你永遠唱多啲歌畀我聽......」未講完，隔離個女仔搶咪話：「如果有時限嘅話，我會揀一萬年。」Leon笑答：「放心，我會永遠活喺你哋嘅永遠入面。」

繼續有位中年大叔話：「恭喜你，演唱會順利開，我想參加你嘅演唱會已經有10幾年，你啲歌陪住我成長。」由於大叔個樣睇落都唔後生，現場觀眾即刻哈哈大笑，大叔繼續話：「喺我荳蔻年華嗰時，已經聽你嘅歌，你嘅音樂陪住我長大，你嘅歌代表咗我嘅青春年代。」Leon回句：「我確係經歷咗好多唔同年代，荳蔻年代，年青嘅時代。」

Leon全晚唱歌都周不時同觀眾握手，有班歌迷趁偶像行到附近，即對住佢唱生日歌，Leon話：「祝12017、2018年生日嘅人，生日快樂。」講完佢都唱番首生日歌，再自爆：「上個禮拜我拍戲時，劇組問我幾時生日，我答3月15。費事啦！唔想開工搞多餘嘢，我會解釋番，不過我身份證上面係寫住3月15號生日嘅。」突然台下有觀眾大嗌黎明好靚仔，Leon笑話：「好多人都靚仔過Leon，我嘅座右銘，係唔好做最蠢嘅一個，做人懵懵地最幸福。」

Leon唱完一輪歌，唱到滿頭大汗，有觀眾遞紙巾畀佢，佢就猛咁抹個頭，然後話：「通常人嘅構造，腳板底排汗，我就喺個頭度，成個頭濕晒。」抹汗時，佢發現台邊有份禮物，就話：「呢啲就係緣份。」講到收唔到口嘅Leon忽然又自爆：「我同曱甴小強好有緣，夜晚喺屋企飲水都會見佢哋出現。」此時，有歌迷大聲問黎明驚唔驚曱甴、老鼠?Leon答話：「我爸爸就驚老鼠，我唔驚，不過我由好驚曱甴，到o依家搞到唔驚，正如蝙蝠俠都征服咗蝙蝠。我細細個有晚發夢，夢到有曱甴走咗入我耳仔，就喺我撩撩吓時，發覺現實中真係有咁嘅事，最終都係殘酷地消滅咗佢哋，呢個世界好多曱甴，冇辦法喇！大家都有機會面對曱甴，惟有小心啲。」

臨完騷時，Leon再送金句：「就快新嘅一年，祝大家心想事成，不過心想係唔會事成，諗係唔得，要用個心去行動去做，唔理動作快定慢，快未必啱時機，都要睇運，不過有行動就係好事。」