【身在倫敦】梁芷珊應付英國佛系抗疫:一星期去一次買嘢
英國梁芷珊武漢肺炎
武漢肺炎在全球大爆發,英國目前有逾1300宗確診,累計35人死亡,才女梁芷珊因17歲女兒Eily在英國讀書,月前芷珊已飛往當地照顧,兩母女都身在英國努力抗疫。
昨晚芷珊在社交網留言:「準備出去衝鋒陷陣,要帶齊用品裝備,早去早回,返嚟要由頭到腳洗一次。英國呢度話,如有輕微症狀,唔好求醫,自行隔離七日。咁即係要買定啲退燒傷風藥,我無帶喺身喎。Grocery購物,減少至一星期一次。」
芷珊接受《蘋果》電話訪問表示:「因為我個女兩個break時間唔係相隔好遠,我一早已經擔心,如果我又出又入,飛多幾次仲危險,所以我諗住嚟呢度閉關做嘢,等幾個星期後佢再放break,我哋會有成個月時間喺度。自己鍾意租apartment住,今次因為呢個疫情唔會出街,只係一星期去一次買嘢,呢度叫外賣好方便。」對於英國佛系抗疫,芷珊惟有自救:「自己準備咗啲成藥,因為呢度係就算有症狀都唔准去醫院,要自行隔離,人同人唔會行得好近,因為地方大,但因為大風,護目罩都幾有需要。儘量自己煮輕便嘅嘢食,就算叫外賣,都會自己再加熱殺菌,所有衫褲帽,出過街一定全部洗過,最緊要係瞓覺瞓得好。身體抵抗力係最後一道防線,會食啲增強抵抗力嘅補充品,如維他命BC、薑黃粉。」
英國已經一罩難求,幸好芷珊有朋友幫忙:「有朋友喺外國寄畀我,唔係好夠,一日唔係用一個口罩,出街可能要用兩三個,我唔係好出街,所以ok嘅,如果出街我會叫的士,多數好大架,司機同後面位有玻璃隔住,感覺安心啲。」
對於港府宣佈19日零時零分起,英國入境後要強制家居檢疫14天,芷珊說:「我唔係太擔心返嚟要隔離14日,喺屋企隔離我係ok嘅,平時都可以十幾日唔出街,對我嚟講冇乜大影響,唔會驚要隔離就趕住返嚟,而家睇阿女學校安排,最主要佢今年考公開試,如果佢喺呢度考,我哋唔會走,但如果可以改喺香港考,睇吓幾時有機票,我都係諗住慢慢,唔會第一時間湧返香港,唔太擔心。」
本身芷珊已買了4月尾返港的回程機票:「其實提早返嚟機會好微,因為放完復活節假要考入大學試,無謂一來一回,兩邊都要隔離好嘥時間,我唔會太擔心喺呢度容易受感染,最緊要唔好去人多地方。」
-----------------------------
第三屆最港電影大獎
按此立即投票 -----------------------------
【武漢肺炎】專頁 全民自救 抗疫資訊盡在《蘋果》
芷珊在英國租屋住,每星期出外一次購物。(互聯網圖片)
芷珊:「自己準備咗啲成藥,因為呢度係就算有症狀都唔准去醫院,要自行隔離。」(受訪者提供圖片)