【新增內容】

鄧紫棋(G.E.M.)嘅「Queen of Hearts世界巡迴演唱會」香港站，今晚喺紅館舉行尾場，話明係尾場，當然有朋友嚟支持下，王君馨同老公、鍾舒漫、超蓮、胡鴻鈞、許延鏗等等都有嚟。

演唱會於晚上8點28分開始，唱完佢首本名曲《A.I.N.Y.》之後，佢用英文同歌迷打招呼：「Hong Kong make some noise , Hong Kong sing with me.」歌迷嘅反應同《我是歌手》入面一樣咁熱烈，會同時歡呼同大叫，而G.E.M.嘅身形同第一晚一樣，都係脹爆。唱原本由五月天唱嘅《你不是真正的快樂》嗰陣，主動問大家識唔識唱，仲叫大家全場大合唱。

唱到中段，G.E.M.分享佢嘅愛情觀，仲無啦啦感觸起嚟，話有朋友同佢講「你已經好幸福」，因為有好愛佢嘅屋企人、朋友、團隊同埋fans。

突然間，第一晚有嚟送花嘅西裝男，又出現喇，今日佢都係拎住好大紮紅白玫瑰，G.E.M.話：「點呀？你係第一晚求婚嗰個喎，想第二次求婚呀？我標晒冷汗呀…….畀支mic你呀？」西裝男仲喊住讚G.E.M.「坦直、率真、有啲倔強」。G.E.M.話聽到想喊，仲禮貌地收咗紮花。然後西裝男再拎出戒指，而喺台上話自己唔識拒絕人嘅G.E.M.就同佢講：「希望你第日會搵到呢隻戒指嘅女主人，我真心祝福你。」

之後G.E.M.同現場互動玩Kiss Cam，鏡頭影住嘅情侶就要錫錫，G.E.M.見到台下嘅王君馨（Grace）同老公，於是兩公婆即場勁sweet錫錫。G.E.M.話：「Grace呢...（突然又嗚咽）佢喺NY嗰度結婚我去唔到，一個月後喺香港擺酒我又去唔到，今日都仲可以見到你哋錫錫，我太幸福啦。Grace喺我人生好低潮嗰時，成日陪我，佢係最當紅嘅花旦，但佢會擺好多時間陪我祈禱，同我分享，我愛你，Grace。」香港站尾場演唱會就係11點29分完騷。