當年今日

行超市:
三日來貨一次 英國即食Pizza登陸百佳

蘋果日報 2002/01/20 00:00


百佳超級廣場特別多外國進口的即食品,好似呢隻新登場的即食Pizza,現時只有幾間百佳超級廣場及超級市場有售,重係由倫敦空運到港,兼每隔3日即轉新夠晒新鮮,另外重有分別由德國及加拿大入口的Pizza,一樣好味新鮮,還有一些外國小食及甜點。

記者:葉少萍 攝影:伍慶泉
英國入口 五種口味
英國Pizza至尊PizzaExpress,現已登陸百佳,有充滿辣味牛肉、青椒、洋葱芝士及番茄的辣味牛肉薄餅(SloppyGiuseppe)、一陣香蘑菇味道的蘑菇薄餅(Mushroom)、布滿辣肉腸、辣椒、芝士及番茄的美國辣味薄餅(AmercianHot)、由軟腍芝士配鮮甜番茄的馬加韋達薄餅(Margheritane)及有火腿、橄欖、芝士及番茄的娜穎薄餅(LaReine)5種口味,全部都係由英國倫敦直接入口,每3日來貨一次,放入微波爐加熱十分鐘便可。每個直徑有12吋。
最受歡迎 美國辣味
咁多款Pizza,以呢款布滿辣肉腸、辣椒、芝士及番茄的美國辣味薄餅(AmercianHot)最受歡迎,未食已聞到陣陣辣肉腸香味,入口餅皮又腍又脆,辣肉腸夠辣,芝士又香又軟,番茄夠甜。
德國Pizza啱小朋友
呢兩款德國出的Waitrose品牌的Pizza,完全係小朋友口味,有滿布火腿及菠蘿的火腿菠蘿薄餅(Ham&PineapplePizza)、一陣香蒜味及蘑菇味的香蒜蘑菇薄餅(GarlicMushroomPizza),約每星期轉一轉新貨,放微波爐加熱十五至二十分鐘。每個直徑有9吋。


加拿大細Pizza
呢款一盒足夠2人食,兼由加拿大入口的noname牌Pizza,有材料豐富的至尊薄餅(DekuxePizzas)及辣味十足的辣肉腸薄餅(PepperoniPizzas),一盒內有2個,放微波爐內加熱八至十分鐘便可。每個直徑有5吋。
方便西式食品 澳洲櫻桃芝士批
呢款SaraLee品牌的櫻桃芝士批由澳洲入口,入口皮夠鬆,櫻桃味又酸又甜,芝士味鹹鹹哋,所以食落味道又酸又甜又鹹,夠晒特別,愛試新口味的你,不妨試試,放入微波爐加熱約5-7分鐘即可。
英國製泰式咖喱雞
圖左呢款由英國空運來的泰式咖喱雞(ChickenTikkaMakhani),打開就有陣陣咖喱味,入口雞肉又滑又腍,一盒足夠1-2人分量,圖右的咖喱薯仔(BombayPotatos),同樣美味可口,貨品重會每4-5日便會更新一次,保證新鮮度高,只需放入微波爐加熱約6-7分鐘即可。
澳洲果醬冬甩
呢款果醬冬甩由澳洲入口,只需放入微波爐加熱約20秒-1分鐘20秒即可,入口表層又鬆又軟,內裏果醬味又甜又香,一盒有成6個,足夠3-6人食,作早餐、下午茶食品就最好。


PizzaExpress銷售點:
愉景灣、花園道、合和中心、陽明山莊、赤柱、又一城及康樂園百佳分店

*其餘貨品於所有百佳超級廣場有售。