【二月又廿九】女神吳海昕如何揀男神 內附Yeesa大量表情包
ViuTV吳海昕二月廿九Yeesa
憑ViuTV極好口碑劇集《二月廿九》,令港姐出身、在娛樂圈前後混了6個年頭的吳海昕(Sofiee),憑Yeesa角色熬出半個頭,工作量增加,廣告接多了。難得是獲一班向來「尖酸」的網民認同,讚多過彈封為新一代女神。能打動眾多網民,全靠她在劇中多樣的表情。
Sofiee話本身小動作多多,很多動靜都在不經意下經營︰「好似飲嘢我會咬飲管、諗嘢會托住下巴。係好似每一秒都安撫緊自己咁,每一秒都好似要同自己講嘢,我係會自言自語嘅人。試過沖涼口噏噏,嚇到阿媽敲門問我喺度做乜嘢。咁樣可以幫到自己放情緒出嚟,仲試過講講吓喊,嗰次諗自己去到NASA科學家發佈會演講,經歷好多嘢,所以喊。我係一個好多餘、多無謂幻想嘅女仔,性格都好雙魚座鍾意幻想,但其實我係處女座。」
講到被封女神,Sofiee覺得仍有進步空間,她笑說︰「未去到女神境界,女神外貌相由心生,點樣嘅人會反映喺外貌。戲中Yeesa角色先係女神,可能係太平易近人,其實係有啲蠢鈍。我諗男仔就係鍾意咁簡單嘅女仔。」在她眼中永遠的女神是已故歌后梅艷芳,她說︰「到而家我都經常睇佢嘅告別演唱會,佢嗰首《夕陽之歌》每次唔開心都會聽。梅姐唔止好有才華,仲好有自己個人風格。更重要梅姐本身係有好多故事、好多經歷嘅人。我諗佢內心有很大壓抑,但企上舞台佢就好有自信,帶畀欣賞自己嘅觀眾及支持者正能量。」
至於男神,Sofiee有兩大選擇,她笑言出於「義氣」自然要選同劇的劉俊謙,因為他是一位很有想法的男生︰「今次係第二次同佢合作,喺演戲上佢好有目標,佢會同我討論角色之間嘅交流,佢心思細密又好會照顧身邊嘅演員。」義氣之外女神喜歡的男孩類型,是略帶邪氣加一點點缺陷美,所以在《星戰》系列演亦正亦邪Kylo Ren的阿當載華(Adam Driver)正是Sofiee那杯茶,她笑說︰「佢會係嗰種對呢個世界漠不關心,對住我就無微不至。佢係有經歷嘅人,以前打仗所以身型好魁梧。Kylo Ren面上嗰條疤痕好有型。」
採訪:何永寧
攝影︰仇志德
攝錄:Teddy
場地提供︰Parc 古道具公園
化妝: Fiona To
髮型: Zap
[email protected]服裝提供:Sportmax Code,Sportmax
-----------------------------
第三屆最港電影大獎
按此立即投票 -----------------------------
【武漢肺炎】專頁 全民自救 抗疫資訊盡在《蘋果》
Adam Driver在《星戰》中演Kylo Ren。(網上圖片)
Adam Driver在《婚姻故事》跟女神施嘉莉祖安遜合作。(網上圖片)