滙豐前大班艾爾敦（David Eldon）離開獅子行多年，仲未完全同呢間銀行脫離關係，因為大仔艾俊安（Andrew Eldon）今年1月唔聲唔聲加盟滙豐，做咗digital業務主管，咁算唔算係子承父業呢？

艾爾敦服務獅子行37年，喺銀行界好有江湖地位，退休多年，令人最有印象，係佢2014年寫blog，估計特首梁振英應該會因為UGL涉收賄款事件而下台，當年滙豐即刻同佢劃清界線，可惜佢嘅估計未應驗。

佢大仔Andrew關唔關心政治就唔知，不過就一定好關心依家金融業成日講嘅fintech。華華噚日同佢飲茶，講起點樣將滙豐發展成為一間好fintech嘅銀行，佢即刻滔滔不絕，其他問題就唔答。

有趣嘅係，Andrew同爸爸完全唔似樣，艾爾敦係英國人面相，Andrew就留到成面鬍鬚，有少少似中東人，唔講唔知佢哋係兩父子。再睇番佢媽媽嘅相，明顯係個餅印。照咁睇，艾爾敦呢位來自中東嘅太太，基因強過艾爾敦好多喎。

根據Andrew喺Linkedin嘅資料，佢喺倫敦大學畢業，做過幾間公司，全部同多媒體有關，包括賣風帆產品，對上一份工係喺化妝品網站StrawberryNET.com做營運總監，唔少港女都有幫襯。

掌握財經生活資訊，即Like「蘋果ATM」fb專頁啦！
http://fb.com/appledailyatm