【本報訊】洗衣機好似殭屍跳，仲會跳出跳入？本報讀者拍到一段「驚人」片段，親歷家中的惠而浦「大眼雞」洗衣機，在短短20秒中離奇跳出跳入，嚇得事主目瞪口呆：「佢好似人咁跳出嚟，又跳返入去！」
居於將軍澳翠林邨的Helen在母親節前夕洗衫時，突然聽到廚房傳來「轟轟轟」的巨響；走入一看，竟見到「洗衣機好似自己跳出嚟咁，然後轉90度面向我。」Helen立即拿起手機拍下此奇景。

事主嚇呆　手機拍低

豈料10秒後，洗衣機竟一步一步的跳回去，直至跳回廚櫃下的位置。Helen待家翁輝哥回來後，即時向他展示拍下的影像，他大吃一驚：「簡直係奇景，跳少少會有，咁樣跳番入去真係未見過。」做機電工程廿多年的輝哥多次翻看影片，對於此怪現象百思不得其解。
輝哥事後對記者解釋，家人10年前購入型號WhirlpoolAWG3200的洗衣機，多年來從未試過跳出來，他估計當日可能擠進太多牛仔褲與毛巾，「洗八磅衫，一定要用1,000轉；洗五磅衫就用500轉，可能校錯掣」。他擔心洗衣機跳出會扯斷去水喉，弄致全屋水浸，令電線短路。
記者上門測試兩次，分別用500和1,000轉洗八磅衣物，結果洗衣機並沒有再「跳出跳入」，而且十分寧靜。不過輝哥認為洗衣機若再次「出走」會很危險，故打算盡快換機。
惠而浦洗衣機聲稱首創「第六感」智能感應科技，能「因應不同布質的吸水度及衣物重量，為你調校最節能省時的洗衣程式」。但對今次洗衣機「出走」一事，卻沒有給予任何解釋。發言人指該現象甚少發生，相信屬個別事件，因未詳細了解事件而不作出任何評論。
消費者委員會於2011年曾就洗衣機的「震動控制及不平衡衣物」進行測試，發現全部樣本出現「衣物不平衡引致震動」時，洗衣機會自動減速，甚至停止轉動。「不平衡衣服即係好似你放入一個枕頭，枕頭好細好輕，洗衣機好似好空咁，但當枕頭吸滿水就會變到好重，出現好空又好重嘅不平衡情況，導致機身震動。」消委會發言人黃映秋表示，由於他們未對該型號的惠而浦洗衣機進行測試，故不肯評論「跳出跳入」是否符合測試檢準。