當年今日
關於我們

【思鄉病發】自爆拍《蒲松齡》爛面失眠 鍾嘉欣:以為屋企有鬼

蘋果日報 2017/10/03 18:49

鍾嘉欣馬浚偉音樂劇爛面蒲松齡

鍾嘉欣今日到商台接受馬浚偉(馬仔)主持嘅節目訪問,兩人相識多年一見面自然雞啄唔斷,互相傾起好多以前拍劇嘅往事。
其中馬仔憶述同嘉欣喺09年拍攝劇集《蒲松齡》嘅時候,正值係嘉欣經歷失眠同全身出疹嘅時間,馬仔話:「當時嘉欣因為連續拍幾套劇,失眠加上全身出疹,成塊面都甩皮,睇住佢好辛苦都唔敢休息,於是就由我出聲嗌cut機同導演講,佢咁樣甩曬皮咁辛苦,我都冇心機拍落去,於是就帶咗嘉欣走返去休息。」馬仔直言做演員的確唔應該咁,但係見到佢咁辛苦冇辦法唔出聲 。
嘉欣就話:「當時係因為思鄉病加上休息唔夠,三個月都冇覺好瞓,仲出現幻覺,以為自己屋企有鬼。」仲話外界睇藝人好似好好,但其實背後係好辛苦。
講到近況,嘉欣話好開心o依家嘅生活模式:「加拿大就係屋企人,喺香港我可以做我鍾意做嘅演藝事業,有啲人話我淨係可以選擇一樣,但我覺得條路係我自己控制,我覺得舒服就得。」嘉欣話佢今次返嚟香港兩個星期,老公同囡囡都有一齊返香港過中秋,嘉欣話 :「佢哋o依家出咗去行街,你哋唔好影佢啦 ,佢中文又唔好又唔識路,平時喺加拿大,我就乜都聽晒佢話,返到嚟香港就要我帶返佢。」
至於佢哋之後會唔會再合作?馬仔話:「本來舞台劇都想搵佢,但排練時間好長未必適合,但嘉欣有一個新崗位,就係幫我音樂劇做歌。」嘉欣話:「我已經作咗好多歌畀馬仔,包保佢一定鍾意,全部嘅創作地點都係我屋企嘅厠所,因為阿囡喺樓上瞓咗覺唔可以嘈親佢,於是就喺廁所創作。」