曾經炮製過《海女》、《自戀刑警》等大熱日劇嘅日本著名編劇兼導演宮藤官九郎，昨日來港出席香港國際電影節其電影《早死早投胎之地獄搖滾篇》(TooYoungtoDie)首映，同香港觀眾會面。由於宮藤個人風格強烈，《海女》喺香港亦有好多粉絲，前晚吸引大批宮藤擁躉入場，仲一度起哄。呢部電影中，同佢合作多時嘅組合TOKIO成員長瀨智也扮演一名地獄惡鬼，但相當搞笑。宮藤指因為同長瀨合作多次，佢對長瀨講：「你演過我好多作品，係時候做一個唔係人嘅角色喇！」佢又話：「於是我哋想拍一套關於滾搖但又有啲死蠢嘅電影。」

有觀眾問宮藤角色人選係咪早就定下，佢表示除長瀨之外，男扮女裝嘅肥婆角色JUNKO由諧星皆川猿時扮演就一早決定，更要對方全身脫毛！被問到佢特別鍾意以青春作主題嘅電影或劇集，對佢嚟講甚麽是青春，宮藤表示：「雖然我差不多46歲，但我仍覺自己好青春，所以青春就係現在進行式，人長大咗但其實仍有好多唔成熟嘅地方留喺心中，所以我會繼續拍青春電影。」

而喺日本因今年1月一宗嚴重交通意外，多名學生死亡，同片中情節十分相似，免令人安，所以延期上映，今日日本方面終於宣佈會喺6月底上映。