艾威同陳慧敏今日喺柴灣接受由陳淑蘭、強尼主持嘅ViuTV節目《晚吹--總有一件喺左近》訪問，艾威今次喺節目大談老師好與壞，佢話3月受邀喺浸大教演技課程：「初時諗接唔接受呢個咁大挑戰呢，教大學喎，唔係講笑，40年前我曾經考過傳理系又考唔入，估唔到40年後教番人，既然天安排，我咪接受，最多被人鬧誤人子弟。」

艾威表示喺課程中教學生講粗口，佢認為衝破咗講粗口呢個關口，對自我介紹同情緒發洩好有幫助：「有啲學生講唔到，但有個學生嘅情緒一發不可收拾，連張凳都打爛埋，因為講粗口可以影響一個人嘅情緒。」

至於陳慧敏喺節目大談朋友話題，佢指同朋友相處有好多樂事，其中一件難忘事就係自己唔小心將紅眼症傳染畀室友林欣彤。