立法會除咗有唐營，近期仲多咗個「糖」營，成員仲要清一色梁粉系，包括測量界謝偉銓、工聯會郭偉強同麥美娟，以及民建聯蔣麗芸同何俊賢等。唔通佢哋眼見梁振英唔掂，變節挺唐？大家千祈咪有咁嘅美麗的遐想，事關佢哋嘅目標唔係挺唐而係要滅「糖」，同梁粉身份一啲衝突都冇囉。

工聯會孖寶打到封頂

不過呢，此「糖」不同彼「唐」呀，佢哋其實係至hit遊戲Candy Crush擁躉，當然以消滅糖果為目標啦。當中以工聯會孖寶最厲害，兩位已經打到200幾關封咗頂，要update先有得繼續作戰。郭偉強話最鍾意臨瞓前玩，簡直係最好嘅催眠方法，而呢個game對佢嚟講最有意義嘅地方，原來係要成日喺facebook問人攞心續命，覺得係一個增進友誼好方法喎。麥美娟都話，有時等攞心等到囉囉攣，唔易捱㗎，好在佢都係趁得閒先玩吓啫。
謝偉詮喺當中嘅表現就差啲嘞，至今玩到120幾關咋，佢話係受家姐喺fb大晒戰績影響而「沉迷」，通常都係臨瞓前玩、過吓手癮咁啦，笑稱以前都喺diamond遊戲中，虛度唔少光陰。
民建聯梁粉滅糖似乎冇咁得力，全立法會最後生嘅議員漁農界何俊賢，都係打到去百零關左右。至於元秋，原來都係挺梁叻過滅糖多多聲，佢話玩到卅幾關就冇玩咯，最初玩嘅原因，係見咁多後生仔like，咪去試吓有乜嘢咁巴閉，但佢由始至終最鍾情嘅遊戲，都係那些年嘅「俄羅斯方塊」，果然係癡心情長劍呀！

mailto:[email protected]