【狗仔出更】細細粒食力驚人 孖張秀文鯨吞炸雞
蘋果日報 2020/06/15 00:30
陳嘉佳張秀文
身形與食量成正比的陳嘉佳（細細粒），閒時最愛在社交平台貼出關於「食」的相片，更曾直播自己挑戰大胃王，不用一小時的時間，她輕易KO了5人份量的食物，可見她「食」力驚人！日前《蘋果》在銅鑼灣利園商場捕獲細細粒，同行還有好姊妹張秀文，當時她們漫無目的在商場行街兼食lunch，但揀了一輪都找不到心水餐廳，於是她們到了客戶服務中心，辦理泊車優惠手續後，再徒步轉戰另一個商場。
查實不止「三個女人一個墟」，兩個女人走在一起，同樣可以「雞啄唔斷」，本來她們去附近的酒店覓食，殊不知撞正餐廳暫停營業，兩人惟有轉向時代廣場方向進發，其間細細粒似乎難頂肚餓，入了一間麵包店買麵包。經過一番折騰，終於找到可以食飯的地方，她們選擇了在時代廣場一間食Pizza的餐廳，兩人被安排坐在近門口位置，張秀文選擇背向門口而坐，避免被人看見她的食相，反而細細粒一於懶理，在短短一小時內，先後order了兩杯飲品、pizza、炸雞、魷魚圈等食物，見到她大大啖鯨吞炸雞，食量認真驚人，醫肚後由張秀文埋單，兩人齊齊行去停車場拎車走人。
採訪、攝影：朱志聰、吳耀輝
細細粒找不到合適的餐廳，辦好泊車優惠再轉場。
開餐前都要買麵包醫肚。
鯨吞炸雞。
細細粒果然食力驚人！
張秀文負責埋單。
細細粒「又食又拎」！
張秀文與細細粒外出覓食。