【香港公開劍擊賽】女子重劍人才輩出 朱嘉望：fencing is my life
蘋果日報 2019/12/08 22:05
江旻憓朱嘉望何迪琳佘繕妡香港公開劍擊賽
朱嘉望（左）在女子重劍四強不敵何迪琳，僅得季軍。
劍擊面罩之下，朱嘉望（Moonie）有着長長睫毛，十指亦塗滿指甲油，單看外貌難以想像這位24歲的女生是香港女子重劍隊一員，她亦直言「真係冇人知我係運動員」。代表港隊出賽，跟隊友一同努力爭奪東京奧運入場券卻無人知曉，會感到不甘嗎？Moonie卻表示：「如果我勁到好似Vivian（江旻憓）咁，行出去所有人都識就當然最好。我想人哋認得我，係因為我好勁好勁。」
周日在石硤尾公園體育館舉行的香港公開劍擊錦標賽，世界一姐江旻憓和佘繕妡均未有參賽，可惜女子重劍隊的Moonie在四強以6:15不敵何迪琳，未能重溫8月挑戰盃的冠軍滋味。這位24歲劍手笑言自己守強攻弱，之後需好好訓練並尋求進步，希望明年一月在古巴世界盃交出好表現，並嘗試在個人賽打入64強，「我個人賽會好驚，而團體有三個女仔陪住我，我會打得勇啲。」
香港女子重劍隊現時世界排名以161分暫列第13，中國（328分）和南韓（227分）則分列第3和第7。港隊若要以團體資格躋身東京奧運，只能寄望中韓皆取得前4直入奧運的資格，而港隊則靠亞洲第一晉級。Moonie早前轉全職運動員，為的也是衝擊2020年的奧運，「我喺（雅加達）亞運前一年轉全職，就係為咗準備亞運同奧運。」
兩年全職生涯中，Moonie坦承有苦有樂，重要的是勿忘初心：「其實第一年好掙扎，唔知自己做緊乜，打到好厭，返到去練劍就會好唔開心，覺得成個環境都好大壓力。不過你要記得點解自己鍾意呢個運動？點解你想留低？點解你要繼續咁辛苦喺度練？」放棄或有千萬藉口，但堅持的理由只得一個：「劍擊係我嘅生命，我真係好鍾意呢個運動，好好彩我份工都係我好鍾意做嘅嘢。」
女子重劍隊必須取得奧運的團體入場券，現時女單世界排名145的Moonie才有機會踏足這個體壇殿堂。現時在港大修讀心理學的她笑言，若能出戰東京奧運的話，希望透過自己經歷勉勵他人，努力活出自己：「我喺呢個社會揀咗一條唔同啲嘅路，如果我真係去到奧運，而我都好想其他人學到呢樣嘢，有時可以揀一條與別不同嘅路。」
記者、攝影：許嘉明
朱嘉望