身為藝人第二代,難免自小就會成為傳媒焦點,細細個時都仲未識得話唔鍾意,總之媽咪爹哋叫自己喺鏡頭前打招呼就照打招呼,叫自己要匿埋唔好上鏡咪匿埋,免得曝光。
但係小朋友始終會大,會有自己生活圈子,就好似早年嘅藝人二代房祖名、鄭欣宜,都不時被影到相約朋友夜蒲或聚會相片,近年經常見報就分別有林德信同王曼喜等。
有兩位掌上明珠嘅毛姐毛舜筠,亦正正面對兩個寶貝女開始長大,對見報與否有自己睇法階段。
毛姐今日去到中環接受dbc數碼電台節目訪問,講到讀緊大學嘅大女,佢話佢好矛盾話:「有時佢叫我唔好講佢,於是見到傳媒,我叫唔好影到個女,佢就反問我點解佢唔可以曝光,所以我好難做,盡量唔講佢。」
今年毛姐會做多少少幕前拍攝工作,嚟緊下半年會同老友謝寧,籌備拍約30集生活體驗節目,內容將圍繞煮食、生活、運動、點做一個女人嘅話題,明年更可能會參演舞台劇。