黃淑儀（GiGi姐）個28歲囝囝徐肇平，上個月被傳媒踢爆同張曦雯拍拖，估唔到佢愛情得意嘅同時，事業亦同樣得意，獲ViuTV力邀加盟拍攝新劇《三一如三》，飾演游學修嘅hehe對象，戲份都唔輕。

其實徐肇平舊年傳拒簽無綫經理人合約而俾無綫雪藏，最後徐肇平同無綫喺舊年8月續咗一年藝員約，不過就唔見佢幕前有乜演出，除咗見佢同媽咪GiGi姐為馬來西亞華麗台主持《儀煮賀年菜》之外，只係喺今年播出劇集《殭》當中客串幾集，而呢個劇其實舊年1月至6月拍攝，換言之，過去一年無綫真係冇乜畀嘢佢做。

正所謂東家唔打可以打西家，最近ViuTV就向徐肇平招手，成功邀請佢加盟《三一如三》演出。《蘋果》打畀徐肇平，但佢就話一切交由經理人回應。之後本報再聯絡GiGi姐，佢話：「我個仔係交咗畀Kawaii（前DJ黃靜），要問Kawaii先知，佢都冇乜點樣同我提過，但我知道佢同TVB contract滿㗎啦。」講到個仔舊去同無綫續一年約都冇乜嘢做，GiGi姐話：「我覺得佢好多嘢做，不過都係外面嘢，就唔係TVB嘅嘢，所以我都冇理佢。佢一路都有嘢做，所以佢好開心，又去拍旅遊節目。」似乎暗寸TVB咁噃！

問GiGi姐會唔會戥個仔有新劇拍高興？佢話：「分開嚟講啦，年輕人出嚟闖，點都要畀多啲機會佢先得，邊度都好啦，有嘢做都係一件好事嚟嘅。」GiGi姐o依家幫無綫拍劇，個仔幫ViuTV，兩母子咪變咗打對台？GiGi姐笑話：「冇所謂，我同TVB都係部頭嚟。」

《三一如三》已經播咗4集，當中都有唔少hehe鏡頭，好似夏雨個仔黃奕晨（Dixon）原來一直暗戀前劇中飾演健身教練嘅陳安立，佢兩個做完運動沖涼嗰陣，Dixon仲同陳安立有所暗示添，而今晚將會播出第5集。

今日聯絡咗《三一如三》編審南方舞廳，講到徐肇平個角色，南方舞廳透過WhatsApp回覆：「徐肇平個角色唔係hehe，係游學修鍾意佢，唔會因為咁令佢hehe到就唔講住，因為未諗，哈哈！」講到之前佢監製部《瑪嘉烈與大衛系列 綠豆》都牽涉到hehe劇情，南方舞廳話：「兩部劇都有hehe，因為同性戀呢個課題喺主流傳媒從來都冇一個比較接近現實（貼地）嘅演繹，都係想畀觀眾有另一個觀感，而且大家生活周圍都一定有hehe friend，o依家都好普通，其實冇咩特別啦，可能以前啲劇唔多，有hehe又唔係咁做。」南方舞廳咁鍾意寫hehe題材，記者大膽問佢其實係咪都係hehe？南方舞廳話：「個人問題就唔答啦，我又唔係藝人。」