【台灣直擊】「蟻俠」保羅「黃蜂女」伊雲祖蓮 合巹交杯餵食糖
蟻俠2:黃蜂女現身復仇者聯盟3:無限之戰Ant-Man And The Wasp伊雲祖蓮莉莉保羅活特
Marvel超級英雄新片《蟻俠2:黃蜂女現身》(Ant-Man and the Wasp)將於下月3日在港上映,兩位主角日前就抵達台灣,展開一連串宣傳活動。今朝「蟻俠」保羅活特(Paul Rudd)及加拿大女星「黃蜂女」伊雲祖蓮莉莉(Evangeline Lilly)就一早於台北文華東方酒店舉行記者會。
二人在會上分享唔少拍攝趣事,伊雲祖蓮話雖然套戲用好多後期製作,令佢哋有變大縮小嘅效果,但片場上都會見到超巨型嘅道具,包括一個十尺長嘅麵包袋夾!另外 保羅就指想將美國隊長變大放入戲中,但似乎又太hard sell!不過當中嘅動作戲,就真係來自真功夫,伊雲祖蓮話:「我哋同時有四組戲一齊開,有好多特技演員一齊拍攝。」保羅:「伊雲祖蓮確係做得唔少,另外我想讚讚啲特技演員,因為難度太高,好多時都唔俾我哋親身上陣!」
另外二人都十分為食,伊雲祖蓮話自己一到埗就食咗13款雪糕,而保羅就話自己鍾意食菜圃蛋。其後電影公司送上兩個英雄造型嘅糖膠公仔,佢哋即刻勁興奮。當知道真係食得之後,又咬頭又咬腳,更加玩「合巹交杯」互餵食糖!
精選娛聞,喺晒《娛果》
http://fb.com/appledailyent