出壚金像影后毛舜筠及「最佳新演員」凌文龍噚晚喺銅鑼灣出席電影《黃金花》慶功。毛姐攞影后之後就去咗日本玩，佢仲自爆日日賣醉：「老公都知，佢知我開心，因為今次一齊去旅行冇壓力，日日開派對，瞓到兩點先起身，自己醉足4晚，冇壓力好易醉，仲晚晚飲香檳。」做咗影后之後，問毛姐會唔會加片酬？佢話：「呢啲問番經理人，最緊要係劇本好。」係咪好耐無加？「唔係，適當時候係應該加。」

凌文龍同契媽兼經理人余安安一齊接受訪問，小龍話攞獎之後，即刻請契媽打邊爐，同埋送咗條絲巾俾佢，契媽係好鍾意絲巾，凌文龍就話嚟緊想舞台劇同電影兩邊兼顧發展，可以有更多角色發揮。安安就一邊話契仔亂洗錢，一邊笑住話叫佢儲多啲錢，問安安小龍會唔會加片酬，佢話：「唔係咁樣嘅，最緊要係有好嘅角色，最緊要係有得做，希望同阿仔拍戲，想今年內成事，我做阿媽佢做仔，之後想試下俾佢做壞人角色。」

精選娛聞，喺晒《娛果》
http://fb.com/appledailyent