葉國謙一到場就發現呢個靚位已經俾人佔據,行人路掛滿「天滅中共,天祐中華」橫額,佢心知不妙衝口而出講咗句:「佢哋掛呢啲嚟做乜?」八個大字寫得好清楚啦,阿謙你唔係唔明嘛!雖然對啲橫額睇唔順眼,不過阿謙唔使自己操勞,八方見佢一邊行入附近商場門口嘆冷氣,一邊打電話叫人call警察嚟清場。
雖則執政黨落柯打,不過幾名警察慢條斯理半粒鐘後至到場,而且睇完一輪就收隊,並冇清場,最後民建聯死死哋氣要自己行開啲,更要冒險喺個棚架下面開檔,民記一班青年成員就擒高擒低掛起大大幅「賑濟兩岸災民籌款」橫額,八方睇見都戥佢哋牙煙。