經民聯工程界議員盧偉國同建測規園界議員謝偉銓，除咗同樣都係來自功能組別，同時亦係全國政協委員，估唔到佢哋都要同直選議員一樣，hardsell成功爭取，搵食認真艱難！

話說佢哋早前聯手去信國家住房同城鄉建設部（住房部），希望內地放寬港資建築及工程公司承包內地工程嘅限制，結果有意外收穫。今日同傳媒茶聚分享喜訊，指住房部早前回覆佢哋，表明會積極考慮取消港資建築同工程公司嘅有關限制，以支持香港建築業融入國家發展大局、深化兩地專業交流會合作，謝偉銓形容佢哋今次可謂「超額完成」，盧偉國就話嘞，由於兩地體制唔同，過去業界喺內地發展都遇上「大門開、小門未開」嘅問題；今次住房門部嘅回覆，相信可為業界打開廣闊天地。

講到呢度仲未明？查實都係關於大灣區。謝偉銓希望內地可用大灣區作試點，並估計稍後兩地更新CEPA時，能夠落實取消有關限制，佢同時希望港府能推動兩地嘅專業資格互認考試恆常化，方便本港業界到內地發展。